Galdaragintzan dugun eskarmentuari esker, piezaren diseinuan parte hartu eta aholkuak eman ditzakegu. Produktuen garapen egokian esku hartzen dugu eta ibilbide osoan zehar laguntza eskaintzen diogu bezeroari, piezaren diseinuan (tolesketak, muntaketak, soldatzeak…) nahiz ondorengo prozesuetan.

Helburua ahalik eta produktu onena egitea da; bezeroarentzat ona dena, guretzat ere ona da.

Proiektua bulego teknikora iristen den unetik, muntaketa, mekanizazio, soldatze eta tratamendu termikoen premia guztiak hartzen dira kontuan. Horrela, azken emaitza ezin hobea izatea lortzen dugu, eta akatsak egitea eta produktua garestitzea saihesten da.

Ematen diogun garrantzia dela eta, zerbitzu bereizi gisa eskaintzen dugu soldatzea.

Gure soldagailuak soldatze-prozesu desberdinetan daude homologatuta: 3 milimetrotik gorako xafla, material eta posizio desberdinetan. Soldatze-prozedura desberdinetan dago homologatuta enpresa, eta prozedura horiei ikuskapen bisualak egiten zaizkie. Bezeroak eskatzen badu, ultrasoinuen, likido sarkorren eta bestelako tekniken bidez egin daitezke ikuskapenak.

Halaber, trenen sektorerako soldatzeen EN-15085-2 araua daukagu, CL1 sailkapen-mailakoa.

Piezak guztiz amaituta jasotzeko aukera eskaintzen diegu gure bezeroei. Alegia, bezero guztiek kudea ditzakete piezaren gainazaleko tratamenduak, hala nola inprimazioa, azken pintura, galvanizazioa, zinkeztaketa, eta abar.

Pieza batzuk egonkortu egin behar dira, soldatzeak, oxigeno bidez ebaketak, mekanizazioak eta bestelako prozedurek eragindako tentsioak arintzeko. Bi aukera eskaintzen ditugu: batetik, bibrazio bidezko egonkortzea eta, bestetik, egonkortze termikoa.

Bibrazio bidezko egonkortzea gure instalazioetan bertan egin daiteke, edo bezeroaren instalazioetan.

Egonkortze termikoaren kasuan, geu arduratzen gara gestio hori egiteaz, eta amaitutako pieza helmugara bidaltzen dugu tratamendua egin ondoren (egonkortuta, granailatuta eta inprimatuta).

Mekanizazioa ohiko prozedura bat da gure fabrikazio-prozesuan, guk geuk egiten ez badugu ere. Lekolanen tamaina eta mekanizazio mota desberdinetako hornitzaile espezializatuekin egiten dugu lan, piezaren beharren arabera.

Helburua bezeroari amaitutako pieza entregatzea da, horrela, pieza kudeatzeko eta manipulatzeko lana ekidin dezan, mekanizazio-prozesuan bertan batzuetan gertatzen diren arazoez gain.

Azkenik, gure zerbitzuen artean, piezak munduko edozein tokitara edo azken helmugara bidaltzeko aukera eskaintzen dugu.